Este es el manifiesto en asturiano del comité de Solidaridá Asturies con Rojava que desde el grupo Higinio Carrocera apoyamos y en el que participamos.
Dende va tiempu coleutivos y persones d’Asturies entamamos actos de sofitu y difusión a la Comuña Internacionalista de Rojava, un territoriu nel norte de Siria onde’l pueblu kurdu ta desendolcando, en plenu sieglu XXI, una revolución de calter feminista, ecoloxista y asamblearia. Esta revolución tuvo’l so aniciu nel 2012, anque s’inspira en lluches muncho anteriores, y nos años que lleva tuvo qu’enfrentar enemigos abondo. Ún de los más importantes foi la guerra escontra l’Estáu Islámicu o ISIS, na que les fuercies revolucionaries internacionalistes, encuadraes nes YPG ya YPJ xugaron un papel imprescindible na so derrota. Nun podemos escaecer qu’el ISIS representa’l fanatismu fascista na so estaya más sanguinaria, que causó yá milenta muertes, tortures, esclavismu y vexaciones a civiles de los territorios en conflictu.
Fai unes selmanes l’estáu turcu y el so presidente Erdogan, somorguiáu en postures fanátiques y ultradrechistes, invadió Rojava cola fin de desaniciar la población kurda. Les razones son el valor estratéxicu d’esti territoriu, incluyíu nel contestu de la disputa per recursos comu gas o petróleu, amás de la amenaza que supón el proyeutu políticu de Rojava pal réxime fascista de Turquía. La propuesta política de Rojava, el Confederalismu Democráticu, plantega una sociedá ensin Estáu, enllena de valores de progresu, y supón una esperanza de futuru pa tol Oriente Próximu. D’ehí qu’el capitalismu y el fundamentalismu yihadista sientan mieu de que s’esparda per otros llares.
Nesta situación ye perimportante la postura adquirida polos estaos occidentales, la Xunión Europea y los Estaos Xuníos principalmente, y tamién Rusia. Llueu d’años de llucha escontra’l ISIS nos que s’usó al pueblu kurdu como primera llinia de frente, agora permiten la invasión turca de Rojava. Nun podemos dexar de mentar que Turquía ye un país onde se vulneren los drechos humanos más básicos, froma parte de la OTAN y tien tratos comerciales coles llamaes “democracies occidentales”, ente ellos la compraventa d’armes coles que a la postre masacren al pueblu kurdu. Y ente eses “democracies” ta l’estáu español.
Varies persones pertenecientes a dellos coleutivos políticos, sindicales y sociales d’Asturies decidimos constituyir el Comité de Solidaridá Asturies con Rojava pa sumanos a les campañes internacionales d’apoyu a la revolución nel norte de Siria. Si tienes interés en sumate a esta llucha pues contautar con nós pelos siguientes medios:
Mail: asturiesconrojava@riseup.net
Facebook, Instagram: Asturies con Rojava – Inicio
https://m.facebook.com/Asturies-con-Rojava-107715373981180/
Twitter: https://twitter.com/AsturiesR
GRUPO ANARQUISTA HIGINIO CARROCERA 